بما إننا هنتكلم عن الأطفال فأول حاجة بتيجي في بالنا الألوان زي الأزرق والسماوي، الأخضر والأصفر… طيب هنحط كل الألوان دي في الحوائط؟ طبعًا لا!
هنقولكم 9 نصائح مهمة لفرش غرفة نوم الأطفال:-
- يفضل الحوائط تكون لون واحد محايد فاتح زي الأبيض والسماوي والروز.
- الألوان الإضافية يفضل تكون في ورق الحائط والسجاد لأن الألوان الكتير هتعمل شوشرة وعدم تركيز.
- نقدر كمان نعمل حيطة واحدة بس هي اللي فيها ورق حائط بالألوان والأشكال اللي الأولاد يختاروها.
- وكمان نعمل حائط لإنجازات ورسومات الأطفال وأعمالهم اليدوية ومقياس الطول اللي بيبقى بأشكال مختلفة.
- أما بقى السجاد أكيد هنسيب ولادنا يختاروه على ذوقهم علشان يشاركوا برأيهم ودا بيزيد الثقة بالنفس عندهم وهنختارها مكملة لألوان وشكل الغرفة وتكون سهلة التنضيف وناعمة.
- من أهم العناصر اللي لازم ناخد بالنا منها هي الأرضيات لأن الأطفال بيجروا ويتنططوا فوارد جدًا إنهم يقعوا فيفضل استخدام الباركيه أو الفينيل لأنهم بيمتصوا الصدمات وأفضل في التدفئة عن السيراميك.
- آخر نقطة نتكلم عنها النهارده هتكون الإضاءة، الإضاءة جزء لا يتجزأ من الديكور ولازم تتوزع صح وتؤدي وظيفتها صح.
- الأفضل تكون الإضاءة لونها أبيض علشان تساعد على التركيز وأكيد ضعف الإضاءة عند المذاكرة مؤذي جدًا للعين.
- أكيد هنحتاج أباجورة جنب السرير يكون إضاءتها خافتة علشان تساعد الأطفال على النوم لو هما بيخافوا يناموا في الضلمة.
