غرفة المعيشة من الغرف المهمة اللي بتجمع أفراد الأسرة مع بعض علشان كدا هنقولكم إزاي تهتموا بكل تفاصيلها:-
لازم لما نختار مكانها تكون الغرفة اللي بتدخلها الشمس وإضاءتها تكون دافية وألوانها مريحة للعين زي اللون البيج والألوان الزاهية الربيعية أو الأبيض.
لازم نبعد عن الألوان الغامقة والألوان الكتيرة المزعجة.
المرايات مهمة وبتعمل انعكاسات للإضاءة وبتدي إحساس بالاتساع ويفضل تكون أشكالها دائرية لأن الشكل الدائري بيوحي بالتوازن والحياة وممكن كمان شكل المربع أو المستطيل لكن نبعد عن الشكل الثماني.
بالنسبة للكنب والكراسي طبعًا يفضل تكون ألوانها زاهية وتكون في وضع مستقر علشان تدينا إحساس بالاستقرار والراحة.
الشبابيك زي ما اتفقنا لازم تكون بتدخل الشمس والهواء علشان تعمل تجديد لهواء الغرفة.
أما عن الستاير هنبعد عن الألوان المبهرجة ويفضل الأقمشة السادة.
لمسة إضافية بقى تدينا إحساس بالحياة وتجدد طاقتنا وهي النباتات وحوض السمك وأهم حاجة نبعد عن النباتات الشوكية زي الصبار ويفضل طبعًا النباتات الطبيعية.
التابلوهات فى ألوانها تكون زاهية لايقة جدًا و مكملة لألوان الغرفة وممكن تكون لوحات معبرة عن الورود والألوان الربيعية وكمان شكل الجبال و الماء كلها أشكال تدعو للبهجة والحياة والاستقرار.
